d Schwigamuatta

I hob imma gmoant, i war de gresste Ratschn vo da Provinz. Bis i di Schwigamuatta vo meina Nochbarin kennaglernt hob. Eigentli is goar nimmer d Schwigamuatta vo meina Nachboarin, oba des is a andre Gschicht. Wenn sie gwusst hät dass ich d Nachbarin vo ihra Schwiegatochta bin hätts fleicht net so vui vazählt. So hots an Hafa Schmarrn dazählt.

Mei - da Bua soitts doch amoi bessa hom! Jetza hot scho de erste nix taugt mit der er beianand gwen is. Weil se se mit andre Manner eiglassn hot. Oba a Hausfrau - a Hausfrau woars a guade, sei Ex. Grod blitzt hots bei da Ingrid un do host vom Bodn essn kenna so gschpiegelt hot der. Oba die wo a jetza hot des ko jo net guat geh. A so an jungs Ding. und mitn putzn hot ses aa net. Mei - un wiar de daherkummt in wos für oide Hodern! Oiso naa, da Bua, dass der nix bessers find.

Amoi bin i bei dera eiglodn gwen - zu am kaffee hots gsogt. An Haufa Leit san do gwen - weil - wiar i erst schpäter mitkriagt hob, de andere Schwigatochta Geburtstog ghob hot. Des woar fei scho a Untaschied, sog i eich. Mei Nachboarin woar a dortn. Ganz stad is dohockt weil se se net woi gfühlt hot. Do hots ma richtig leid dua, mei Nachboarin. Oiwei glästat hot d Schwigamuatta - weil bloss a Jeens oghobt hot und an Pullover. Un de andere - des woar a so a feines Weibaleit! A richtige Dame tat ma bei de Franzosn sogn. Und elegant hams dua - alle mitanand. De andre woar anscheints a Dame von Welt... eigentli ganz nett se hot ja a nix dafür kenna dass d Schwiegamuatta d Schwägerin dableckt hot. Beim Fuim is, hots gsogt. Jo mei, hob i ma denkt - do ko a so einfachs Weib wiar i net mitredn.

Nachat hobns alle mitanand zum dischputiern ogfangt. Zerscht is üba ois kreiz un quer ganga, und nachat hobns über Abtreibung gred. Na hob i mi eimischn miassn - weil i moan wenns koid is na ziag i hoit an woarma Sockn drüber dass mi net gfriert. Un wenn i unbedingt pimpern wui (damois woar i no jünger und hob des a no kenna) nacha muass hoit da Kerl a Haubn drübaziagn. Pariser sogn de junga Leit dazu. I woass zwar net wos des mit Paris zum dua hot - oba egal. Oda as Wei nimmt a Anti-Bebi-Piulln. Muass ja net jedesmoi glei schwanga wern. Naa, hot de Schwiegatochta vom Fuim gsogt - si sigt des net ei si tat abtreibn wenns schwanga werdn tat. Mei Nachboarin woar grod schwanga, und dera is boid schlecht wordn vo dem Bledsinn.

Und as hechste kummt no: na verzählt doch de Schwigamuatta vo da Nachboarin wenns des damois scho gebn hätt nachat häts a abtriebn. Dazua muass i eich no sogn. Se hot an ledign Buam in d Ehe mit neibrocht . Nochm Krieg hot ja fast a jedes zweite Wei a ledigs Kind ghobt. Un wissts wer der ledige Bua gwen is? Da Mo vo meina Nachboarin. I hobs recht unschuldig ogschaut un gfrogt: tuats eana jetzt leid dass an Buam aufs Weit brocht hobn? Na jo, host gmoat, wenns amoi do san de kloana Buzele nachat sans ja ganz nett..

Oiso - do hot ma mei Nachbarin scho leid dua. Mit dera Schwigamuatta. Und da Mo war a net gscheita, bloss dem hot mas net glei ogschaut. Oba des vazehl i eich beim nächstn moi.