Neili hob i an Nachbarsbuam truffa, a aufgwecks Bürscherl, sog i eich. Wos ma der verzählt hot....Am besten ihr lest as selba.

Vor siebnadreissig Johr, a wannst as net glaubst s is woahr:

do hot mei Papa, da Hansi, a Frau kennt di wo Erni ghoassn hot. Und weils dahoam net zsamm kumma san, sans in Woid ausse ganga. Und wiar des so is - do is hoit wos gscheng dabei. Und na hat da Papa d Erni gheirat und d Evi is kurz drauf auf d Welt kumma. Ja und wia s na a Zeit lang vaheirat gwen san, hot si di Erni in an andan vaschaugt und meim Papa an Laufpass gebn. Schpäta sans wieda zsammakumma, des woar vor fast dreissig Joahr, und na homs no amoi gheirat. Und weil nix ewig hoit hot si di Erni dann mit n Nachbarsbua eilassn. I woass net wiar der ghoassn hot oba er hot an Bruada ghobt der wo Ernst gheissn hot. Und der Ernst hot 1978 d Evi gheirat. So hots ma zumindest mei Schwesta vazählt. Weil d Evi is mei grosse Schwesta.

Fast in da gleichn Zeit wiar mei Schwesta mit n Ernst ganga is hot mei Papa mei Mama kennaglernt und is ehra a Zeit lang nachgluffa, bis er s kriagt hot. I hobs net direkt mitkriagt, weil da hob i ja no net glebt, des hot ma a mei Schwesta Evi dazählt. Und dann hot mei Papa da Mama mi gmacht und a viertel Johr schpäta da Ernst meiner Schwester an Manfred. Des hoasst i bin da Onkel vom Manfred und da Manfred genau drei Monat jünger ois wiar i. Und weil i net alloans bleibn sollt hot mei Mama meine Briada kriagt.

Wannst jetzta moanst, des woar ois, jetza geht’s erst richtig o. Da Ernst hot si mit meina grossn Schwesta gschtrittn, und mei Schwesta is eam dafu. Zu dera Zeit woar mei Schwesta vui bei meina Mama und mir, und i hob do scho a wos mitkriagt. Vor allem, wenn dann mei Schwesta von am Kerl vazählt hot, der manchmoi bei ihra gschlafa hot. Vastandn hob i s zwar net, aba mei Mam hot si drüba aufgregt und mei Schwesta mei Mam a blede Hausfrau gheissn. Des woass i no genau; weil da war mei Mama so sauer dass mei Schwesta dableckt hot.

Mei Mama hot a a Freindin ghobt. Di hot Vroni ghoassn und war mit n Sepp vaheirat. Und di zwoa hobn a a Kind mitnand ghabt - die Maria. Die Maria is so oit wiar mei jüngsta Bruada, die zwoa san sofort guade Freind worn und genga mitnand in d gleiche Klassn. Des gfoit ma goar net, weil die Maria mir a gfoit  und wenn i gross bin ...

Oba i woass net, ob des geht wiar i mog. Weil wo i sechse wordn bin hot mei Mama vom Schtress mit meim Papa d Nosn voi ghobt. Bevor dass ganga is, hots oiwei bei uns im Zimma gschlaffa und da Papa is auf d Nacht kumma und woit mit ihra redn. Oba in da friah um zwoa woar des meina Mama z bled. I hob des a bloss mitkriagt, weil i wiar a Kanickel schlaf und mei Mama dann manchmoi bleckt hot. Tja und dann is ganga und hot si bei ehra Freindin ausgwoant, da Vroni. Und i hob amoi bei meina Mama gwohnt und amoi bei meim Papa, und d Vroni und die Maria san imma zum Papa kumma weil die Maria mit mein Bruada schpuin woit.

Und wiar dann mei Mama imma weniger zu mein Papa und d Vroni imma mehra zu mein Papa kumma is no hob i gseng dass d Vroni imma runda wordn is. Amoi hob i s beleidigt, do hob is gfragt warum s denn so dick wordn is. Na is rot wordn, und mei kloana Bruada hot na gsogt: Quatsch, di kriagt a Kind. Do woar i achatahoib und mei kloana Bruada fünfe. A poar Tog nach mein Geburtstog is na Vroni ins Krankahaus kumma und mit an Bebi wieada hoamkumma. An dem hot da Papa an Narrn gfressn ghobt. Des woar a Madl, Zenzi. Net lang drauf is d Vroni vom Sepp wegzogn und mit da Maria und da Zenzi zum Papa und uns zogn - weil i und meine Briada woarn unta da Wochn beim Papa, do hobn ma z Fuass in d Schui geh kenna. Ja und irgendwann hot amoi mei Mama mein zwoatn Bruada gfrogt ob a no a Schwesta mog. Do hot a gsogt: i hob doch scho a grosse Schwesta und die Zenzi schreit imma so. Und dann hat d Vroni uns dazählt dass mei Papa a da Papa vo da Zenzi is. Oiso is d Zenzi mei Schwesta.

A Zeit lang hobn nacha mir drei Buam mit de zwoa Madln und am Papa und da Vroni glebt. Na hobn si da Papa und d Vroni dauand gschtrittn und d Vroni, d Zenzi und d Maria san wieda auszogn. Des woar vo am Johr. Die Vroni kummt manchmoi mit da Maria und lasst die Zenzi do, und wos i woass kummt da Sepp manchmoi zur Vroni wenn die Zenzi bei mein Papa is.

© ratschkatherl